السبت، 7 أبريل 2012

مش لاقيه كلام تقوليه لخطيبك ؟ تعالى اقولك تقوليله ايه



مش هرغى كتير هنزل كلام عاااااااادى جدا بالعاميه تقوليه لخطيبك فى مسج فى مكالمه هتفرحى وهوا كمان هيفرح اوووووووووووووى اوووووووووووووى 

ربنا يسعدكم وهتدعولى 


نقول بسم الله 


من ساعة ما دبلتك حاوطت صباعي و انا حاسة اني لابسة تاج .. حاسة اني بقيت أميرة بجد .. لأ أميرة مين ! دا أنا ملكة .. كفاية إني أنا اللي انت اخترتها ، كفاية انك قولت لي نفسي اجمع كل بنات الدنيا وامسك ايدك وأقول لهم
" هي دي حبيبتي .. هي دي مراتي "
من يوم ما حاوط اسمك صوباعي وانا حاسة اني متطمنة وهادية ورايقة .. كأن دبلتك تميمة سحرية ضد الحزن
وكل شوية أبص لها وأسرح فيها .. أشوف فيها كل حاجة حلوة بيننا .. أشوف أول يوم شوفنا بعض فيه ، وهزارنا وعنادنا ودماغنا الناشفة .. أشوف تلاكيكنا لبعض اللي كنا بنتحجج بيها من غير ما نحس علشان نتكلم مع بعض
لما اكون مراتك دا معناه إني هضمن إني من حقي أناديك في آخر لحظة من عمري ، واطلب منك تقعد معايا شوية لأني خلاص بموت .. علشان عايزة اشبع منك .. وانت تقولي" لأ .. ما تقوليش كده "وتزعل مني .. وأشوف في عنيك لحظتها كل حاجة حبيتها فيك .. المح خوفك عليا .. حبك ليا .. زعلك مني .. وابتسامتك وانت بتحاول تطمني ..وأفضل باصة لك لحد ما روحي تروح لربنا .. وألمح ملامحي في ملامحك واتطمن .. لأني عارفة اني هفضل عايشة فيك وبيك زي ما كنت طول عمري عايشة بيك وليك

والله بحبك .. بس بستهبل

^^'
برغم انى وافقت على الخطوبة من غير ما يكون في بيننا اى ارتباط


الا انى بعد ما اتخطبنا اكتشفت ان قلبي كان بيحبك من ورايا

او يمكن لما عرفتك اكتر .. لما عرفت احلامك .. لما شوفتك ازاى بتعبر
عن مشاعرك

صدقك مع الناس .. وحتى رخامتك وهزارك


كل يوم عن يوم حبي ليك بيزيد



وكل يوم عن يوم بحسنا بنقرب من بعض اكتر



وكل ما اشوفك بحس انك زعلان منى او ع الاقل قلقان


حاسس اني مش بحبك قد ما بتحبنى

علشان انت دايماً تعبر عن حبك ليا


كتير اوى بتقولى كلام من روعته مش بقدر ارد


وكتير اوى بيبان عليك انك بتحبنى وانت خايف عليا


وانت بتحمينى


وانت قاعد عندنا في البيت وغصب عنك بتسرح فيا

والله انت لو تعرف انا بحبك قد ايه هتفرح اوى


انا بحبك وبفهم معنى كل كلمة وكل تصرف بتتصرفه

وبيبين قد ايه انت بتحبنى لكن بستهبل وبعمل عبيطة

ولو ركزت شوية فى تصرفاتي هتعرف انى بجد بحبك


لو شوفت قد ايه بتوحشني
وقد ايه بتكلم عنك مع اصحابي
ومع اخواتى فى البيت



كل كلمة بتقولها بتدخل قلبي ومش بتطلع



كل حاجة بتقول انك بتحبها غصب عني بلاقيها
حبيبتى



كل حاجة بتكرهها بلاقي حاجة بتنفرني منها



اكيد دا مالوش معنى غير اني فعلاً بحبك



لكن خايفة افتح قلبي



مش خايفة منك ابداً لأ


لكن خايفة ان ربنا يكتب علينا الفراق
لأي سبب



وكل حرف نطقناه يبقى ذكرى - رغم حلاوتها - بتعذبنا



بكرة نتجمع في بيت واحد وصدقنى هبطل
استهبال


هو يعني ايه الفرق بين حياتي معاك وبين حياتي مع أي حد تاني ؟؟


ماهو كله جواز .. وكلها حياة .. وكل حياة فيها مشاكل 


دا كلام ياما سمعته زمان 


لما اخترتك انت بالذات اكمل معاك حياتي


لما كنت بعيط وانا بصلي وبدعي ربنا يرزقني بيك زوج واني ما اكملش حياتي غير معاك


عارف الفرق ؟؟


الفرق ان اي حياة من غيرك هي حياة ملهاش طعم 


اي حياة تاني هتبقى " عيشة وخلاص " لكن معاك انا بجد " بعيش " 


معاك بعيش كل حاجة في حياتي بطعم تاني


حتى النفس اللي بتنفسه ليه طعم تاني


بتنفس معاك كل نفس وانا نفسي اعيش مليون سنة 




لكن قبلك كنت بتنفس واقول 


ياريت دا يكون آخر نفس 


الفرق بينك وبين أي حد تاني اني اخترتك انت 


اخترتك ودا كفاية انه يخليني اتحمل اي حاجة في الدنيا علشان اثبت ان اختياري كان صح 



الفرق ان حتى خناقنا بيبقى بحب 


بنبقى بنتخانق واحنا خايفين على بعض

خايفين على احساس بعض وماحدش فينا بيجرح في التاني 

الفرق بينك وبين أي حد تاني .. ان احلامنا واحدة 

وحتى لو انا بحلم بحاجة خاصة بيا انا انت بتحب احلامي وبتحضنها 

وبتحاول تساعدني احققها .. رغم انك مش هتستفيد أي حاجة


انت بس عايزيني مبسوطة


مش زي أي حد تاني .. ماشي في طريق وانا في طريق تاني خالص


الفرق بينك وبين أي حد تاني انك انت الوحيد في الكون بحاله اللي بتفهمني من غير كلام 

وبتحس بيا لو حتى انا في اخر الكون وانت في الطرف التاني منه




الفرق بينك وبين أي حد تاني .. اني مخلوقة من ضلعك انت


واني حتة منك انت .. جزء من روحك


علشان كده انت الوحيد اللي ينفع تكملني .. مش أي حد تاني   شوف حل بقى .. كده مش نافع

بجد كده مش نافع


وصلت في حبك لدرجة اني مش شايفة في الدنيا غيرك


كل الدنيا عندي انت ..


كل حاجة حلوة اشوفها عايزاها تبقى بس ليك


كل زمايلي في الشغل بتلغبط واناديهم باسمك


وطول ما انا قاعدة لوحدي .. بحس انك معايا وبنسى وبكلمك


وبعدين افتكر انك لسة ما جيتش


او اني في الشغل وانك مش معايا


وما بقيتش اعرف اكل الا معاك .. 


ولا اتفرج على التليفزيون الا معاك


ما بستمتعش بالشاي بتاعي الا على ريحة قهوتك


وبقيت بغير عليك لدرجة مرضية


انت عارف ؟


اسمك على موبايلي بفضل اغير فيه




لحد ما يبقى بعيد عن اسم اي بنت


بغير من كل حاجة تشوفها وتعجبك


وما اكونش انا اللي عملتها


يالهوي .. انا شكلي بقيت مجنونة بيييييك


لأ دا أنا مش شكلي اتجننت ....


دا اكييييييييييييييد  


LinkWithin

Related Posts Plugin for WordPress, Blogger...
كونى انثي